السلام عليكم ورحمة الله وجمعه طيبه..
أول شيء الله يرحم الحاج / يحيى عبدالله علي حيدر برحمته الواسعه ويسكنه فسيح جناته ويعصم قلوب أهله وذويه ويصبرهم ويلهمهم الصبر والسلوان ويشهد الله ان وجع قلبي ع المرحوم وكل التعازي الحاره لكافة آل حيدر الكرام..
والحمدلله ع سلامة الشاب بليغ يحيى حيدر…
واسأل من الله ان يهون مصيبتي ويصبرني واقدر اخرج من الصدمه ومن ذا الشعور اللي مش قادر اوصفه لكم أبداً، الله لايرويكم ولا يذوقكم ذا الشعور والاحساس…
وصلني كلام من أصحابي اللي ماقصروا معي وقالوا ان في كثير ناس نشروا عن الحادث اللي كتبه الله والحمدلله على كل حال، ماكنت اشتي الخبر يخرج للسوشل وحاولت انا والشباب نتكتم ع الموضوع مش عشان شي لكن من الشوشره لاننا عارفين ان صح في ناس بانحصل منهم دعوه طيبه وكلام طيب لكن في ناس سامجين والله يهديهم يكتبوا كلام يوجع القلب ومايعرف ان الناس في وضع يصعب ع الكافر..
للاسف البعض كتب كلام من تأليفه او سمع غلط وكتب بدون ما يسأل..
واللي اوجع قلبي فوق وجعه كلام البعض ومنشوراتهم المسمومه، اتقوا الله وحسبنا الله ونعم الوكيل في كل حد يكتب شي غلط يوجع به قلوب الناس..
القصه بإختصار اكتبها لكم من داخل الحجز وقلبي ينكوي مليون مره كل مااذكر اللي حصل والموقف ذا اتعبني نفسياً وجسدياً واحرم عيوني النوم من الكوابيس والقلق والحمدلله ع كل حال..
اللي حصل بعد ما كنت في الحصبه جهزت اغراضي وتفاقدت السياره لاني كنت اتجهز للسفر بعد الفجر الى عدن وابين اجيب أمي والأهل ، المهم جهزت الامور وكنت مروح البيت الليل تقريباً 10 الليل وماشي في خط المطار..
وصلت نقطه خط المطار الاوله ورجعت واصلت طريقي في خط المطار السريع، بسرعه متوسطه، رغم ان الخط سريع ومافيش فيه اي تقاطع او طرق فرعيه أبداً ..
المهم قبل نقطه المطار الثانيه قبل صاله المطار يوجد خط الاربعين اللي يتفرع من خط المطار السريع لكن خط الاربعين مغلق بصبيات وباكوام تراب ومهجور من سنين ومظلم كامل..
ومن بين الصبيات خرج لي متر فجأة وبدون سابق إنذار وقطع عليا الخط يشتي يطلع من فوق الرصيف عشان يرجع خطه الثاني، وماكان في قدامي اي مجال الا اني هربت للرصيف عشان احاول اتجنبهم وكانت الصدمه بركن السياره الايمن ، المتر كان فوقه الحاج يحيى عبدالله الله يرحمه وابنه الشاب بليغ..
جنبت ع طول ونزلت في نفس اللحظه احاول اتحمل الحاج واتفقده ورجعت اصيح للسيارات وسط الخط عشان نسعفه للاسف البعض رفض والبعض كان معه عوائل وكثير جنبوا وشافوا اللي حصل وناديت عسكري من النقطه اللي قدامنا وجاء صاحب باص دباب الله يفتح عليه قال يله باسعفكم وتحملت الحاج يحيى الله يرحمه انا وابنه والعسكري واسعفناه..
طبعاً حاولت اسعف بسيارتنا في نفس اللحظه لكن للاسف سيارتنا مارضيت تتحرك لانها تضررت وماتحملوها الا بونش..
البيتكوين يتجاوز 97 ألف دولار: آمال جديدة في سوق العملات المشفرة
المهم اتحركنا اقرب مستشفى اللي هو يوني ماكس دخلنا والحاج في حضني وحضن ولده والشاهد الله انه كأنه ابي اللي في حضني.. وقلبي مقبوض وحاله لايعلم بها الا ارحم الراحمين..
بلغونا انه الحمدلله ع قدر الله الحاج يحيى توفاه الله برحمته الواسعه باذن الله.. وابنه بليغ اللي كان معه فوق المتر فحصناه وسوينا كشافات من والى.. والحمدلله طلع سليم معافى..
طبعاً انا سلمت نفسي للجهات المختصه ومحجوز للان..
والاصحاب والمشايخ والاعيان راحوا صباح اليوم التالي للمستشفى بعد التنسيق مع اهل المتوفي.. وحكموهم بالبنادق وطرحوا حق الدفن وارضوهم بثور وقلنا لهم احنا باذلين لكم وماتشوفوه انتوا تأمروا واحنا ننفذ وابوكم ابونا، قالوا اهل المتوفي مطالبهم و الخبرة نفذوها لهم بالكامل..
والحمدلله أهل المتوفي ونعم بهم كثر الله خيرهم ماقصروا وقالوا هذا امر الله وقدره وتم الدفن بحضور الكل والعزاء وتم العفو فوق القبر امس بوجود أولاد وإخوان المتوفي الله يرحمه وكل ناسه ..
واليوم كمان العزاء راحوا كل اصحابنا للعزاء والقيام بالواجب وكان نفسي اروح اعزي لان قلبي مقبوض الله لاوراكم ذا الشعور لكن لازلت محجوز بسبب عدم وصول ورقة التنازل بسبب الإجازة…
وللعلم ماكنت اشتي اذكر اي تفاصيل عن الحادث ومافيش لا غلطان ولا مش غلطان هذا امر الله والحمدلله، قد راحت روح لعند ربها الرحمن الرحيم، ومثل ماقلت لهم كل اللي طلبوه يعتبروه تم وانا مستعد اتحمل كل شي لو ابيع ماتحتي وفوقي والحمدلله على كل حال..
طبعاً المرور نزلوا وخططوا كل شي، وكمان كانت النقطه قريبه مننا جدا وكمان سيارات كثيره جنبت وشافوا الحادث وابن المتوفي الحمدلله سليم معافى مافيه شي وكان حاضر كل شي ..
والناس اللي يجيبوا كلام غلط ويجرحوا بكلامهم المسمم ويكتبوا منشورات من راسهم وكله تأليف في تأليف…اتقوا الله واعرفوا ان الطرفين واهلهم كل واحد عايش في حاله صعب عليكم تتصوروها وتفهموها .. الله لايبليكم
بالنسبة لي محجوز في الحبس للان والله اعلم الى متى دعواتكم والحمدلله على كل حال وحسبنا الله ونعم الوكيل.
الفاتحة لروح المنتقل الى جوار ربه
الحاج المرحوم / يحيى عبدالله
نسأل من الله أن يسكنه فسيح جناته و يلهم أهله و ذويه الصبر و السلوان و أن لله وأنا إليه راجعون.
أخوكم / حسن الجفري
